Mark 8

1– 2Nwyihoi, aza je yezhi n mwa-begye, nyagyi a kuɓa zo. Yesu wa yi Wo abara Wa gna ɓa ge, “Mi gye a zaye sun-sun lo ntu ge, oɓa nyipyei tahi nu nyi naiye nyagyi yi to ye ɓai celo ba gyim. 3Nma tun ɓai n na pyi to ɓai gyi nyagyi mm ɓa ɓa cafyi zokwo. Ntu ge aza lo ɓai knu naba kpai.”

4O wa ɓara nyawo ge, “Yi ɓa bwa nyagyi n zhabui ye a gaɓa ɓa gyi?”

5Yesu wa nya ɓa ge, “Fye n bredi yi shi n gnu a kniya?” Ɓa ciwo ge, “N gnu tnaba.” 6Wa gna aza ge ɓa ku sase zhi kni. Wa go bredi wa sa Shekwoyi ami, Wa sa kwo ya, Wa ga Wo abara ɓa gna za. 7Awyisala ɓei nyi fyewyi, Yesu wa kuɓa Wa tuɓa anabarka Wa ga Wo abara ɓa gnaza.

8– 9Aza vinya, ɓa gyi nyagyi nubo a kuɓa fu. N navun Wa gna ɓami ɓa lo apyi. Aza ɓei yezhi nlo dubu gun anyi (4,000) Sa na ɓei ye awyiwoyi zhi a bwa a ceknu dnagmayi ngun tnaba.

Fye ye Aɓo Wo-woyi Ngun Akninya?

10N sai-sayi Wa lo ʼnwo abara yi ɓa ɓe Dalmanuta kni. 11Sa na Yahudawayi tukwoda ɓei kpe ge Wo la ɓe, ɓa ɓe Wo aba n na bai ɓa na ɓo n woi. Ɓa ciwo ge, “Zhin yi oɓo wo-woyi ya gye! Zhin nyaho kw zhin n nanyi bmana! N na bayi ya gaho gaiciya!”

12Wa do ʼmi n mwa sa Wo ɓei wo lonu wa ciɓa ge, “Mi ta zhin m, fye ye a tnu-tnu a wo-woyi nshan-sun gnu akninya?”

13Wa je eya lo Wa fa ɓa Wa piya lo ola pma deyi. 14Owo abara ɓa ku zamwi to ɓa la nyagyi m, ɓa bwalo n bredi yi shi gmanyi nu n ʼya.

15Sa ɓaɓei lo ɓai pi ola ya, Wa gnaɓa, “Fye zhin peceiye n yeast Esu Hiridus nya n na Farisawayi nya yi.”

16Ɓanya ge, “Wo da kniɓeyi na? Kpekni Wo da bredi nu ɓo n ya zamwi nyi.”

17Yesu wa ku kpe ɓeye n ɓa da, Wa ciɓa ge, “Mi ta da cenun. Fye to kpe ɓo ye nmi dan? Efya bugba dna kala lo nu to fye kpe awyegan?

18“Shi Ishaya da, ʼFye na wyei gyi n wyeba gye ye a tun-tnu a wo-woyi nshan-sun ɓo wye ma? Knihi nu zhin to fyei gu atnubua ya fya wo ɓo ma? Fye ta pa ɓo lo m? 19Aza dubu n gnu atnu (5,000) Mi ɓo fuɓa nubo na bredi yi ngnu 5 nyi ma? Fye ɓo ye apisayi zhi acekun ngnu akninya?” Ɓa cige, “Aceknu awo-cei-aba.”

20“Esa nmi ɓei kpa aza dubu ngun anyi (4,000) n bredi yi ngun tnaba, knidonu ɓo ce a?” Ɓa cige, “acekun ngun tnaba.”

21“Fyei gye ge Mi damu lo shi fyeto bredi yi shi lon?”

22Sa ɓa ɓei si Baitsaida, azaho ɓa ɓe n wyebuayi, ɓagyi wo wye ge Wo kawo gna. 23Yesu wa la wyebuayi yi Wa gmiya gni woi n piwun Wa kni akni kpewo na wye Wa tu wo ɓa bwaya, Yesu wa nya wo ge, “Ho gye nyaho lo sayi?”

24Zahi wa shi awye laɓa wa cige, “E, mi gye azalo, ama mita gyelo dei-dei n, ɓa wulo ngye ashinwa gbigbi nu zan-zan laɓa.”

25Yesu wa tuwo ɓa bwaya njesun, Shi zahi ɓei cewa wye zun, awye kna woya vinya, wa gye nyaho-nyahoi sarai.

26Yesu wa tnu woi nwo aza ʼba. Wa gnawo ge, “To jezelo kauye ho kpam.”

Ho Nu Zhin Masifu

27Yesu nwo aɓarayi, ɓa fa Galili ɓa lo Kaisariya Filibi akauye. Shi ɓa ɓei zan-zan lo, Wa nya ɓage, “Aza zhin nubo ge Mi zhin nyikado na? Ɓa dalo gena n Mi tukwoa”?

28Ɓa ciwo ge, “Azaho zhin nubo ge Ho zhin Yohana Baptisma zhinyi nu, aza ho cige Ho zhin Iliya nu, azaho cige Ho zhin anabi sapainya ho nu nwa lakala n vingwo.” 29Wa nya ɓa ge “Fye gyege Mi zhin nyikado na?” Bitrus wa cige, “Ho nu zhin Kristi.” 30Wa gnaɓa ge ɓato gna zaho-zaho yim.

31Wa ya ɓa a wahala gna n ɓa ɓa sun Wo, njesyn a za yakwo, n na prist tukwoda yi, n na Yahudawayi tukwoda yi, ɓa ɓa nawo aɓo, har ɓa wuwo, ama Wo ɓei lakala n vingwo nu anyi-pyei at avun. 32Wagnaɓa ce pei-pei. Bitrus wa la Wo lo ceyi n sepa gmanyi wa gnakni Wo, wa ciwo ge, “Kwo to bmiya Ho da a Be ye pyam.”

33Yesu wa pmiwyeshi Wo abara Wa gnakni Bitrus Wa ciwo ge, “shetan, la pmigni Ma vun. Ho da zanyikwoci ɓeda nu, to ge Shekwoyi nyam.”

34N navun Wayi Wo abara ɓedo n deji yi ge ɓa ɓe ɓa wo. Wa gnaɓa, Fye wo, eza n woye wa vi Mi, wo la anyida yashi wa lami zundu wa vi Mi n bugbayi gmanyi. 35N ho ye ha gni ho wye-wyei, ho ɓa bwi kwo nuwan, Sai aza n ɓa she ɓa wye-wyei ya ntu Mi ɓo, n Nabari manayi yi, ɓa ɓa kpe nyaye na yige wye-wyei bwa.

36Mi gye eza gyiba, wa bwa anyi vinya ama owo wye-wyei kwa bwi dace? 37Nyaho lo ndu ʼza wye-wyei? 38Eza nwa womi vinyikwo n Mi nabari yi dna na nyipyei nukwoyi ye tna gaiciya ga nya, Emi, Kristi, sa Mi ɓei jeze ɓe dna Mi Dada mwamwa n na malalka gyi-gyi-yi Mi ɓei wo zahi vinyikwo ce.